بقلم: د. بسمة فتحي
احترم اللي اكبر منك،، اوعى تزعل عمو ،، اسمعي كلام طنط ،،، احترم اللي اكبر منك مهما قالك علشان يقولو عليك مؤدب ،، اسكت لو المدرس عملك حاجه وتعالي قولي،، طنط دي اكبر من مامتك انت اللي فاهمها غلط،، عمو استحاله يكون قاصده كده ليه انتي دماغك فكرت كده،،،
وقفه لو سمحت✋
انت مش عارف انك بتعلم ابنك او بنتك بالشكل ده انها تكون معدومة الشخصيه ادام اي حد أكبر منهم في السن وكأن الكبير ده مباح ليه كل الاطفال بالقول او بالفعل عمرك مالفت نظرك ان عباراتك دي بتضعف شخصية ابنك مهما كبر ادام اي حد اكبر منه وجعلت منه جسم مباح بالقول وبالفعل لاي شخص اكبر منه سواء رجل او امرأه ومن هنا بيجي التحرش بالاطفال سواء بالقول او بالفعل ومن غير مايدافع عن نفسه لانه اتربى علي ان اللي اكبر منه مباح له كل حاجه واستحاله يكون غلطان وحتى لو ابنك حس او بنتك شافت ان ده تحرش مش هتقدر تتكلم ولا هدافع عن نفسها علشان كلام حضرتك ليهم ان الكبير تحترمه وماتفكرش فيه غلط وماتقولش حاجه علشان تفضل مؤدب في نظر الكبار!!!….
العباره الوحيده الصحيحه اللي تربي بيها ابنك او بنتك
((( اي حد كبير لازم يحترم سنه هو الاول علشان انت تحترمه ماتسمحش لاي حد انه يهينك او يتحرش بيك بالقول او بالفعل وتسكت ليه ابدا مهما كان علاقتنا بيه ))) من هنا هتعلم ابنك ان مفيش فرق بين الناس الا بالاخلاق والاحترام وهتقوي شخصيته في المجتمع ومحدش هيستهان بيه ابدا..
الاهم من كل ده انك هتحسسه انك السند والامان ليه وانك بتربيه انه شخصيه يعتمد عليها ويقدر يحافظ علي نفسه في اي مكان ومع اي حد..
